Færsla þingsætis í kjölfar alþingiskosninganna 25. apríl 2009

7.5.2009

Í 8. gr. laga um kosningar til Alþingis segir að tíu þingsæti séu í Norvesturkjördæmi og ellefu í Suðvesturkjördæmi. Landskjörstjórn er falið í 5. mgr. 31. gr. stjórnarskrárinnar og 9. gr. kosningalaga að breyta lögbundinni skiptingu kjördæmissæta milli kjördæma ef fjöldi kjósenda á kjörskrá að baki hverju þingsæti er helmingi færri í einu kjördæmi en einhverju öðru kjördæmi. Eftir hverjar alþingiskosningar ber landskjörstjórn því að reikna út hvort misvægi atkvæða milli kjördæma kalli á slíka breytingu sem tekur þá til næstu almennu alþingiskosningar.

Eftir alþingiskosningarnar 2003 var eitt kjördæmissæti fært frá Norðvesturkjördæmi til Suðvesturkjördæmis á þessum grundvelli. Niðurstaðan eftir alþingiskosningarnar 2007 varð að áfram ættu að vera níu þingsæti í Norðvesturkjördæmi og tólf í Suðvesturkjördæmi. Eftir kosningarnar 25. apríl 2009 kom í ljós að misvægi atkvæða milli þessara sömu kjördæma hafði aukist svo að nauðsynlegt reyndist að flytja tvö þingsæti milli þeirra. Við næstu almennu alþingiskosningar verða því átta þingsæti í Norðvesturkjördæmi, sjö kjördæmissæti og eitt jöfnunarsæti, en þrettán í Suðvesturkjördæmi, ellefu kjördæmissæti og tvö jöfnunarsæti.

Útreikningur sem liggur til grundvallar  (pdf)